2015eko maiatzaren 6an, Errenteriako Udalak Energia Iraunkorrerako Ekintza-plana (EIEP) onartu zuen, jasota uzteko udalerriak Alkateen Ituna ekimen europarraren baitan hartutako konpromisoak betetzeko jarraitu beharreko bidea, alegia berotegi-efektuko gasen isuriak 2020rako 2007koak baino %20 gutxiago izatea lortzeko.

Planean 80 neurri zehaztu dira, 8 ildo estrategikotan banatuta: eraginkortasun energetikoa, energia berriztagarriak, mugikortasun iraunkorra, biodibertsitatea edo hondakinak, besteak beste. Neurri horiekin, 2020rako % 20´16 gutxituko dira berotegi-gasen isuriak, 2007ko datuak erreferentziatzat hartuta.

Mendi eta Ingurumeneko zinegotzi José Manuel Ferradásek duenez Udalak diru-laguntza eskatu diola Gipuzkoako Foru Aldundiari eraginkortasun energetikoa eta energia berriztagarriak lortzeko neurriak gauzatzea helburu duten proiektu hauetarako:

1. Beraungo argi publikoak berritzea: 213 kale-argi LED teknologiako argiekin ordezkatuko dira. Proiektuaren aurrekontua 120.676,69 € da eta 2015 urtearen amaieran gauzatuko da. Ekintza horri esker, CO₂ isuriak 17.977 tona gutxituko direla kalkulatzen da.
2. Udal-euskaltegiko eta HHEko eraikineko galdara energia berriztagarriko (biomasa) galdara batengatik ordezkatzea eta eraikineko energia monitorizatzea. Egun dagoen gasoliozko galdara kendu eta biomasazko galdara bat jarriko da, pelletarekin edo zur-ezpalekin funtzionatzen duena. Aldi berean, eraikineko energia-kontsumoak monitorizatuko dira. Proiektuaren aurrekontua 194.939,91 eurokoa da eta 2016ko udan gauzatuko da. Ekintza honi esker, CO₂ isuriak 39.823 tona inguru gutxituko dira.

Bestalde, Errenteriako Tokiko Agenda 21ak inguruneko zarataren aurkako babesak jartzea eta uraren zikloaren kudeaketa hobetzea bezalako ekintzak jasotzen ditu. Horrela, Errenteriako Udalak bi diru-laguntza eskatu dizkio Gipuzkoako Foru Aldundiari Tokiko Agenda 21en lehentasunezko ekintza hauek gauzatzeko:

1. Udalak 2005eko zarata-mapa egokituko du egungo araudia betetzeko eta, horrez gain, zarataren inguruko ekintza-plan eta ordenantza berriak prestatuko ditu: lan hauek 2015eko udazkenean hastea eta 9 hilabetean amaitzea aurreikusten da. Agiri estrategiko hauek idazteko ezinbestekoa izango da inguruneko zarata jasaten duten pertsonen eta gizarte-eragileen lankidetza; horretarako, bilerak eta parte-hartze prozesuak jarriko ditu Udalak abian, zarataren eragin handiena jasaten duten auzoetan arreta berezia jarriz. Lanetarako aurrekontua 42.955 eurokoa da.
2. Errenterian saneamendu-saretik natura-ingurunera egiten dien isuriak aztertzea: Udalak udalerriko saneamendu- eta drainatze-sarea inbentariatu eta digitalizatuko du. Zeregin horiek bete ondoren, sareak euri-intentsitate desberdinekin nola erantzuten duen ikusteko azterlan teorikoak egingo dituzte. Mareen eragina ere kontuan izango da. Hartara, isurketa-puntuak eta sareko tarte kritikoak zehaztu ahal izango dira. Eskuratutako informazioarekin, Saneamenduko Plan Zuzentzailea idatziko da, sarerako premia gehien duten jarduerak definitu eta natura-ingurunerako isurketa-puntu guztiak desagerrarazteko. Sarea inbentariatzeko lanak abian dira eta Plan Zuzentzailea 2016 urterako idatzita egongo dela aurreikusten da. Lanetarako aurrekontua 79.860 eurokoa da.