Eskola Agenda 21 hezkuntza programan parte hartzen ari diren Errenteriako eskolak (Langaitz Ikastola, Bizarain Ikastola, Koldo Mitxelena Institutua, Cristobal Gamon ikastetxea, San José-Gurutzearen Alabak ikastetxea, Don Bosco Institutua eta Telleri Alde ikastetxea) elikadura jasangarriaren gaia aztertzen ari dira ikasturte honetan zehar.

Eskola zentro bakoitzean gaia zein egoeretan dagoen behatu ostean, une honetan Errenteriako egoera nolakoa den aztertzen ari dira. Horretarako, Errenteriako Udalak kontratatutako aholkularitza enpresak (Izadi 21) prestatutako fitxa batzuk baliatuz, eskola bakoitza kokatuta dagoen auzoko saltokiak, taberna eta jatetxeak, janaria erosteko makinak, eta kiroldegiak (osasuna eta elikadura uztartzeko) ikertzen hasiak dira. Kale-ikerketa horietatik eratorritako ondorioak abiapuntutzat hartuz, eskolek hirian hobe daitezkeen alderdiak antzemango dituzte eta ikasturtea amaitu aurretik, Udaleko ordezkariei azalduko dizkiete.

Gaur, hilak 20, esaterako, Koldo Mitxelena Institutuko ingurumen batzordeko ikasleak Niessen merkatal guneko eta inguruetako saltokiak aztertzera irten dira. Horrela, talde txikitan banatu eta erosleei nahiz saltoki ezberdinetako saltzaileei (harategiak, arrandegiak, fruta eta barazkiak saltzen dituzten postuetako baserritarrak, etab.) galdera ezberdinak egin dizkiete eta informazioa idatziz bildu dute.

Era berean, Eskolako Agenda 21en parte hartzen duten zenbait eskola elikadura jasangarriaren inguruan sakontzen eta sentsibilizatzen jarraitzen dute, gaiarekin zerikusia duten jolas eta tailerrak antolatuz. Izadi 21en ingurumen-hezitzaileak, martxoan zehar, Bizarain Ikastolan, Cristobal Gamon ikastetxean eta San José-Gurutzearen Alabak ikastetxean izan dira, besteak beste, honako jarduerak dinamizatzen: dado erraldoiaren jolasa, zapien jolasa eta hanburgesa begetala egiten ikasteko sukaldaritza tailerra.